الاثنين، أغسطس 13، 2007

المصري هو اللّي

المصري هو اللّي بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد بيحط الريموت كونترول في كيس بلاستيك كعادة فرعونية يقف يتكلم على الباب نص ساعة بعد إنتهاء الزيارة والسلام لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد ييجي بعد معاده بساعتين ويفتكر إن ده عادي لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه بيعتبر نفسه أفضل واحد في الشرا والفصال وبعد كده يكتشف إن الحاجة في المحل اللي جنبه أرخص من غير فصال بيحتفظ بأكياس محلات اللبس والأحذية وورق الهدايا تحت مرتبة السرير لسنوات ومابيستخدمهاش عنده صينية مكسرات متقسمة لتلات او أربع أقسام لزوم المزاج وعمره ماإستخدمها ممكن يعدي التلاتين ولسه عايش مع أمه وأبوه وماعندهومش مشكلة بيشتري قبل الفطار في رمضان مواد إستهلاكية أصلا موجود عنده في البيت لسه ماستخدمهاش بيكون عنده شواية لزوم الرحلات أقصى استخدام لها كان مرة واحدة في العيد بيشيل طابع البريد من على الظرف لو الختم ماكانش عليه بيفتكر إن أي حد بيشتغل في الخليج بيغرف فلوس من غير حساب بيكون مشغول بقيمة التيبس أو البقشيش طول العشا ياترى ربع جنيه ولا نص جنيه برده بيتخانق ساعة دفع الحساب بحرارة شديدة على إنه هو اللي لازم يدفع بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم ، وساعتها بيفرش له الملاية
.........

هناك 10 تعليقات:

Samir يقول...

ازيك. يخرب بيتك ياواد ايه الكلام الجميل اللي انت كاتبه ده؟!!!! انت قدرت تجمع الحاجات دي ازاي؟ بجد بوست هايل. موتني من الضحك وعندك حق في كل كلمة.

تحياتي

summar يقول...

احنا شعب فى منتهى الغرور
والاحباط
متخيل ان احنا نقدر على اى حاجة..واى حاجة اى حد بيعملها بسيطة..وماتستاهلش
وبرغم كده مش عارفين نعمل حاجة
اتبرمج على حاجات غريبة..بقينا طبقيين بالوراثة
مش عارفة والله امتى هنفوق

Masria يقول...

lol
بوست هايل يا منير .. جامد جدا .. ضحكني و خلاني أفكر.. و خصوصا فكرة إن أحنا نقعد نتريق علينا و على بلدنا .. بس ما نستحملش حد غيرنا يتريق علينا و على بلدنا .. تفتكر ليه؟ و دي حاجة صح و لا غلط؟

و فكرة الفصال .. عشان بنبقى مقتنعين إن اللي بيبيع ده بيسرقنا ؟ و لا مجرد عرض مهارات؟

و تجميع برطمانات المربي .. يمكن هواية .. أو احتياطي .. يمكن نحتاجها في حاجة

أما بقى فكرة حط الريموت في كيس بلاستيك .. دي فكرة لذيذة جدا .. لي قرايبي بيعملوها حفاظا على الريموت .. و بالرغم إني مش مقتنعة بيها .. بس مش مشكلة

ياه ده أنا ممكن ارغي اسبوع على البوست ده .. كفاية كده
:)

قلب أبيــض يقول...

يعنى ايه كلمة وطن
سؤال محتاج من كل واحد فينا اجابة
شاركونى برايكم
قلب أبيض

Mirage يقول...

لأ بوست يجنن فعلا

حلوة قوى حكاية الأكياس اللى بيحتفظ بيها تحت المرتبة دى

وبرطمانات المربى الفاضية

wade7 يقول...

برافو بس قوللي بجد كام برطمان عندكوا في النملية؟
على فكرة لو سافرت برة مصر اؤكد لسيادتك انك هتشيل البرطمنات .... يا مصري

غير معرف يقول...

أظن الكلام منقول مش انت اللي كاتبه يا منير صح ؟

moneer يقول...

Samir

ازيك يا سمير واحشنى
الكلام ده يا سمير موجود حوالينا لو دخلت مطبخكو هتلاقى نص الكلام ده صح

هى فعلا حاجة تضحك

منورنى دايمة

*********
summar

فعلا دى حقيقة
امتى هنفوق؟؟
لما نحس ان احنا لازم نفوق

*********
Masria

ميرسى يا مصرية

هى دى مصر اللى ممكن كلامنها عنها ميخلصش بكل عيوبهاو متناقضتها
كل الكلام ده من مصر و لو كل و احد بص حوالية هيلاقى كلام اكتر من ده

*********
قلب أبيــض

هزروك علشان نشوف ايه حكاية كلمة وطن دى

*********
Mirage
ميرسى

انا والدى بيعمل كده دايما
بس انا ساعات بتخلص خلسة من الحاجات اللى بيحتفظ بيها
ههههه شرير مش كدة؟

***********
wade7
انا حوالت اعدهم بس هما كانوا كتير مكملتش عد بعد الاربعتاشر
و كان منهم مليان بهارت و حاجات غريبة شكلها بتستخدم فى السحر

***********
Anonymous

انت مين الاول؟

***********

nael يقول...

بيتهيالي دي كانت مقالة لحمدي رزق في المصري اليوم. صح كدا

نائل الطوخي

moneer يقول...

nael

مش عارف يا نائل و الله مصدرهل بس انا قايته مش فكر فين بالظبط المهم انها عجبتنى و فكرتنى بحاجة شبهها اوى كنت كاتبها من زمان بس ضاعت
و حبيت احطها عندى علشان عجيبتنى اوى
و شكرا على ذكر المصدر
و نورت المدونه