الخميس، يوليو 19، 2007

How Addicted to Blogging Are You?أنا مدمن؟؟ و انت كمان؟

85%How Addicted to Blogging Are You?
ادخل هنا و قيس درجة ادمانك للتدوين


تحذير: اللى وقته مهم عنده و مش فاضى زى اللى كاتب الكلام اللى تحت ميقراش و يروح على مدونته اصله فاضى و بيحب يهزر - حد عنده مانع؟؟



انا طلعت مدمن تدوين يا جماعه
و كمان بنسبة 85% اقل من مجموع الثانوية العامة بتاعى بشوية
و العلاج ميؤس منه اصل انا مش ناوى ابطل حتى لو اتقبض عليا و اترميت فى معتقل
ساعتها هفضل اهرّش و اقول للظابط ابوس ايدك يا حضرة الظابط مش قادر لازم اكتب بوست
او افتح اى بلوج من بتوع العيال المدونين
مش قادر الحقونىىىىىى
مشكلة لحسن الحكومة تستخدم الطريقة دى فى التعذيب - فعلا مشكلة ربنا يستر
و بخصوص العلاج هو سهل بس على اساس رغبة المريض و بيتم تقليل جرعة المدونات بصورة دوريه
و التقليل من نسبة الجلوس على النت
كل و احد يخلى باله و اللى لسه جديد فى الموضوع وداخل السكه دى برجليه يبعد بسرعه عن اصدقاء السوء ( المدونين) و يصلى كتيير
علشان السبب فى الاساسى فى المشكلة هما المدونين
انا اصلى بدايتى كانت كده اصل مالك الله يجازيه هوه اللى زقنى على الموضوع اصلى كنت متردد
المهم لازم نلحق الشباب علشان انا حاسس ان الموضوع بيزيد و وسائل الحكومة فى المنع مش جايبة نتيجه
يعنى اعتقلوا مدونين كتير و حبسوا كريم ربنا يفك سجنة وبرضه مش نافع لازم يعملوا حلمة قومية للحد من الظاهره دى لاحسن تنتشر و الناس الكبار هما اللى هيروحوا فى الرجلين و مصر تتقدم و تتطور و ده فى حد ذاته مشكلة
ايه ده؟؟

ايه الكلام اللى انا عمّال اقوله ده؟؟ يلا منك له كل واحد على مدونته يكتبله بوست جديد و يرد على التعليقات يلا منك له
خلاص اتفضت هيا شغلانه و اللى معندوش بلوج يروح يعمل بلوج قبل مالاسعار تغلى و بعد كده محدش هيعرف يعمل حاجه
نعم يا خويا متعرفش؟؟-اه اصل انا صحابى مبيعرفوش برضه- يا ظريف ياللى بتضحك مبيعرفوش يعملوا مدونات و يدونوا- انا بعلمهم بالعافيه
انا بلا فخر المبشّر الاول بالتدوين بين صحابى و معارفى
اللى ميعرفش فى ناس كتّر خيرهم عاملين مدونات و فديوهات لمحو امية التدوين
المفروض تبقى حملة قومية و كل اللى يعلم 74 شخص التدوين ياخد رحلة لقضاء يوم فى احد المنتجعات السياحيه مع الراجل الكبير اوى
و كمان ياخد على الراس باكو شيكولاته جالاكسى و اللى مبيحبوش الشيكولاته يخدوا بسكوت لوكس و باكو شاى ليبتون علشان يعمل فتت قطط
انا حاطط لينكات تحت للى عايز يعمل مدونة و يخش السوق
يعنى محدش له حجه
تصبحوا على خير - زى هيكل
انزل بالتترات

هناك 14 تعليقًا:

اجندا حمرا يقول...

منير تخيل انا جبت مجموع اكبر منك
عملت سكور
87%
ادمان البلوج
شئ جميل فعلا
بس تصدق و الله بيهون علي الواحد مننا البلاوي اللي بشوفها في يومنا
و مش شايفه انه ادمان سئ يعني

moneer يقول...

جميل انا لو كنت جبت المجموع ده كنت دخلت فنون جميلة هاهاها

اكيد ادمان البلوج حاجة جميلة
و بيوسع المساحة الفكرية عن طريق انى اشوف حاجات جديدة

بس تعرفى احيانا بحس انه على الفضى علشان كده مبحسش انى بعمل حاجات كويسة الا فى موضوعات التغطيات الصحفية
علشان كدة مبكتبش عن نفسى كتيير
اكيد مش ادمان سئ بس هيبقى احسن لو بفايدة

Masria يقول...

أنا طلعت مدمنة بنسبة 70% بس .. كويس أوي
أنا متفقة مع اجندا في إنه بيهون العيشة عليا شوية ساعات ..و متفقة معاك إنه بيوسع المساحة الفكرية.. بس ادمان أي حاجة لدرجة إنها تسيطر على تفكيري مش حاجة حلوة أوي بالنسبة لي .. هاحاول ما اخليش النسبة تزيد عن 70%
:)
تحياتي

حـنــين يقول...

هل الرب الإله ذكر؟؟؟


هل قدم احدهم الاثبات على ذكورة الله


أم هو أسقاط السلطة الذكورية على مفردات الأسطورة

elharam يقول...

والله أنا شايف إن نسبتى 65% ومع إنها قليلة ودا راجع لإنشغال الواحد فى الشغل إن شغلى بيتدى 10م ويخلص 7ص -وماتفهمنيش غلط والله شغلانة شريفة- بس دى الحاجة إللى بتنفس عن الواحد وإحباطه لإنى أموت وأنا بادون أحسن ما أموت وأنا ما بعملشى حاجة خالص

elharam يقول...

والله أنا شايف إن نسبتى 65% ومع إنها قليلة ودا راجع لإنشغال الواحد فى الشغل إن شغلى بيتدى 10م ويخلص 7ص -وماتفهمنيش غلط والله شغلانة شريفة- بس دى الحاجة إللى بتنفس عن الواحد وإحباطه لإنى أموت وأنا بادون أحسن ما أموت وأنا ما بعملشى حاجة خالص

أبولهب يقول...

بمناسبة احتفالات ثورة يوليو أنا عاوز المصريين يفتكروا قائدها اللواء محمد نجيب فلو عايز (ة ) تشارك (ى) فيها أنا حاطط على المدونة بتاعتى كود لصورة نجيب ممكن تحطيها فى
add page element html/java code
وده لحد يوم 23 يوليو مع انى عارف ان ده مش هيعوضه هو ولا أسرته عن اللى اتعمل فيهم بس يمكن تنجح المحاولة ويزور قبره رئيس الجمهورية ويقراله الفاتحة أو يكتبوا فى كتب التاريخ اللى مزورينها انه كان أول رئيس لمصر
شكرا

The Alien يقول...

وماله الإدمان؟
حلو وزي الفل وياريت منفقش منه
المشكلة إن الحكومة فاكرة الإدمان مضر
وبتحاول تعالجنا

تحياتي

summar يقول...

هههههههههه الناس داخلة تقول كلام غريب اوى
حسيت ان انا دخلت حارة فى فيلم
كل واحد بيقول حاجة
هههههههه انا بقى طلعت جايبة 61 فى المية
مش اوى انا عارفة نفسي
موضوع جميل يامنير وبلوجاية لذيذة والناس بتتكلم فيها براحتها
:)

محمد ثروت الجابري يقول...

الاختبار لطيف
جبت 78

لو عندك هوتميل ابعتهولي عشان مش بعرف أتعامل مع الجي ميل

moneer يقول...

Masria

كويس انك بتحاولى تسيطرى على نفسك حتى لو كان فى التدوين
لان الشئ اللى بيزيد عن حده بينقلب لضده


***

حنين

شكرا على تشريفك لمدونتى و مدونتك تحفه و مواضيعك جريئه بس لصل انا مش ناقص لعبكه لما اشوةف نفسى الاول هفمر فى موضوع الرب الاله

***

elharam

فعلا عندك حق انا ادون اذا انا موجود

***

ابو لهب

شكرا على الزيارة
بس انا من البداية مش مقتن بثورة انا مقتنع بانقلاب و سرقه و عسكره
الاختلاف لايفسد للكومنت مضمون

تحياتى

***

The Alien

بيشو باشا الادمان ده فعلا مضر للحكومه اضله هيوديها فى داهيه المدونين مش بيسكتوا بيفضحوا فى كل حاجه و صوتهم بيعلا
مفيش حاجة بيتسخبى فى البلد دلوقتى

تحياتى ليك و بسعد اوى بكومناتك الدماغ

***

summar

اهلا بيكى فى مدونتى و اتمنى تزورينى دايما
61% مش مشكلة يدخلوكى كلية الشرطه ههههه
ميرسى ليكى جدا
و انا نفسلى الناس تتكلم براحتها فى كل حتة مش فى البلوج بس

شرفتينى

***

محمد ثروت الجابري

ثروت باشا
اهلا بيك
انا ضيفتك عندى على الهوتميل
مستنيك اونلاين

سعيد انحراف يقول...

يا عمي و ماله الادمان ما اي ادمان شغال
و شكرا على الزيارة يا باشا والله

Samir يقول...

البلد قلبها عليك. أمال مش امك يا جدع. اهم هيبطلوا النت خالص علشان الشباب اللي زيك يفوقوا ويشوفوا مستقبلهم. بس ايه المقابل؟ هيدونا مثلا بدال النت شغل. ماهو هيبقى في فراغ. ولا هيدونا أكل. المعدة ايضا تحيا في فراغ. مش عارف.

غير معرف يقول...

top [url=http://www.001casino.com/]casino bonus[/url] hinder the latest [url=http://www.casinolasvegass.com/]online casino[/url] unshackled no set aside bonus at the foremost [url=http://www.baywatchcasino.com/]online casino
[/url].