الخميس، يوليو 19، 2007

هوامش على حفل تخرّج كلية الشرطة

هوامش على حفل تخرّج كلية الشرطة












النهارده كان حفلة تخرج كلية الشرطة او زى ما بيسميها الراجل الكبير اكاديمية مبارك للامن اصل كل واحد مش عارف جاى منين ( انا قصدى من ورا الجاموسه) يجى للرئاسة يقلبها ملكية و يقعد يسمى كل حاجه على اسمه مش عارف مدينة ايه و اكاديمة و محطة ايه و نادى ابن اخت مين

حاجة غريبة ما هو لمّا يمشى هيجى اللى بعدية و يغير الاسماء دى كلها لاسم تانى و احنا ولا هنا

الصراحه العرض كان حلو وخصوصا ماتش الكرة بتاع الكلاب بس الحكم طرد الكلب رقم 6 ظلم (مش فاكر كان اسمه ايه ركس باين بس هوه لعيب بجح مكنش راضى يطلع) المفروض كانوا يجيبوا حكم من بره اصله الكلاب كان لبسهم ابيض و احمر طبعا وه اسقاط لناديين كبار فى مصر يعنى كان ماتش قمة (بس المرة دى اتحاد الكورة مسرقش التذاكر)

انا كنت فرحان انه تم تخريخ دفعة جديدة من المغتصبين و المعذبين الحمد لله الخير مش هينقطع عن البلد

واحد بيقولى دلوقتى يا عم دى حالات فردية و حالات استثنائية هقولة انا فرحان بتخرج حالات فردية من المعذبين و المغتصبين و الظباط المعوجين على الشعب المسكين

طبعا التدريبات كانت على مستوى عالى و ده يحسسك ان البلد عايشة فى امن رهيب لدرجة ان الناس بتنام و تسيب ببان الشقق مفتوحة ما هو طبعا ظابط الشرطه بيقوم بواجبة و يطارد المجرمين و لا بيروج للمخدرات و لا بيسيب الحرامية و يطارد فى المدونين و المتظاهرين و خيرة شباب البلد ولا يبعمل اى حاجة من شانها بهدلة المواطنين

و كان فى عرض الكلاب بتاع الاطفاء و كانت الكلاب بتطفى الحرايق( رفاهيه اصل احنا و صلنا لمرحلة ان البشر زهقوا و خلوا الكلاب تقوم بالمهمة) طبعا احنا عارفين مستوى الاطفاء فى مصر يعنى مش محتاجين نتفرج على عرض سيرك للكلاب فى حفلة تخرج كلية الشرطة علشان نعرف انا حال الاطفاء و الاسعاف فى مصر تحت الصفر

انا مرة و انا مروح من الكلية شفت حريقة على البحر كانت فى الدور الخامس بعتو عربية مطافى بعد ربع ساعة بسلم لدورين بس و بعد كده اتصلوا بعد كدة بالمحافظ علشان يبعتلهم عربية بسلم 5 ادوار

و مرة شفت اتوبيس بيولع على بعد حوالى 500 متر من نقطة الشرطة و الاطفاء المطافى و صلت بعد نص ساعه و طلعت العربية فاضية مفيهاش مية

و اللهى هو ده اللى بيحصل لية المنظرة بقى فى عروض التخرج؟؟

انا عارف ان عروض السيرك دى خصوصا فى كلية الشرطة حركات مش بجد

انا عن نفسى مش بحترم ظباط الشرطة الا قليل لمّا بيعملوا حاجة عدلة يعنى يقبضوا على تاجر مخدرات او قاتل

بس طبعا انا بقرف من الممارسات الشاذة للظباط دول زى التعذيب و الاعتقال و بتضايق من اللى يقولى دى اوامر مقدرش منفذهاش ساعتها بحس انه كلب مجرد كلب

طبعا الراجل الكبير هو و كلا... قصدى هو و الجماعة بتوعه كانوا قاعدين مبسوطين على الاخر و بصفقوا و اخر انسجام مع انّى شفته فى عروض تانية كان قاعد قرفان و ولا فى دماغه

ده يمكن علشان هو عارف ان الكلا.. يييى قصدى الطلبة دى هية اللى هتحميه بعد كده بس هتحمية من ايه

ده لو جاب قرود من السنغال محدش هيحميه اصل فى لحظة الشعب الغلبان ده مش هيسكت و لا انا شكلى بحلم

شكلة هيفضل ساكت

طبعا الاهالى كانوا فخورين بولادهم و زغاريد و تصفيق اصل و لادهم دول هيبهدلوا فى الشعب كمان كام سنة

طبعا كل الكلام اللى انا بقوله ده ميقلقش من مستوى الكلية ولا من مستوى الطلبة اللى بحترموا نفسهم

و لا الاهالى الغلابة اللى نفسهم يفروحوا بولادهم

عادى انا ليا و احد صاحبى فى كلية الشرطة لمّا بينزل اجازة مش بيعضنى اصلة بنى ادم عادى بس المشكلة انه عايز يدخل امن مركزى وساعتها ممكن اقابله بعد كام سنة فى عبد الخالق ثروت و ساعتها مش هيعضنى لاْ ده هيفتح دماغ اهلى

و طبعا فى الاخر قام حيبب العاد لى بخطاب كله نفاق و رياء و كان معظم الناس دى عارفين كده لانهم كانوا باصيين فى الارض و شكلهم حافظين كلام الانشا الفارغ اللى بيصدعونا بيه دايما

يالا حصل خير بقى عقبال حفلة تخرج كلية الاداب

سلام

هناك 8 تعليقات:

Samir يقول...

امبارح عندي في شبرا وعلى سلم محطة روض الفرج. كانت عربية من عربيات الكلاب واقفة وييجي ست كلاب ماسكين شاب مطلعين دين امه من غير ما حد يعرف حاجة والطريق مقفول الناس واقفة تتفرج. لا احنا قادرين نقول لهم هو عمل ايه. ولا هما مكسوفين يمارسوا سياساتهم القذرة قدام الشعب.
باقي اللي حصل ماعرفوش. علشان كرشونا وراحوا يكملوا على الفريسة المسكينة

moneer يقول...

يا سمير ازا كان الشعب مش مكسوف وواقف يتفرج على حكامه و هما بيبهدلوه كلاب النظام وكلابهم مش هيتكسوفوا
فى يوم من الايام هيحصل العكس و هنقف نتفرج عليهم والكلاب بتبهدلهم

بس هتلاقيهم كاتبين ان الكلاب كانت بتلعب كوره و جت الكوره فى الازاز كسرته فراح الراجل يتخانق معاهم مسكوه طحنوه يعنى الموضوع شجار عادى

انا دلوقتى عرفت ليه انهم بيدربوا كلابهم

mahmod يقول...

awwalan ana 3ayez 2a2ool en ana mashoftesh el3ard beta3 el7afla bs da lemogarrad en ana kont mota2akked enno kalam fare3' we shewayyet este3radat mayenfa3sh tesbet en e7na 3andena aman aw 3ala el2a2al en feeh amal .................bs kalamak ya monir 3agabny geddan la2enno - lel2asaf - kalam mazboot we mafeehooosh 2y 5oof aw mogamla ................. bs ya monir nasee7a eb2a 5ally balak men nafsak elyoomen elly gayyeeen 3ashan enta bada2t te5abbat gamed fi elkela... ..... shoft adeek 3adetny ..........!!!!!! 3omoman rabbena howwa elly beye7my men elkelab eldala elly filshare3

The Alien يقول...

خسارة فاتني العرض دا
أصل محسوبك بيحب السيرك موت
معلش مسيرها تتعوض
أصل السيرك دا شغال عندنا علي طول

تحياتي

princess dodo يقول...

جمييييييييييل
بوست واقعى

غير معرف يقول...

ياربى على الحقد هى كل الرجاله بتحقد على ظباط الشرطه سورى بقى معروف ان شرطه يعنى رجالة البلد اينعم فيهم ناس وحشين بس مش كلهم زى ما فى كل مهنه فيها ناس مش كويسه ويرجع الحقد ده اللى ان مش اى حد بيقدر يدخل الكليه ديه الا بواسطه او فلوس لانها كلية بجد مستوى عالى واكيد مش هتلملم فبيحصل حقد عند باقى الشباب
وعلى فكره الحفله جامده اوى واتحدى اى راجل يبقى بشجاعة ظابط الشرطه كفايه انه بيعرض نفسه للخطر علشان خاطر ناس متستهلش
والناس مش مقدره كل ده علشان شافوا 20 حتى 50 ظابط مش كويس وديه مش اغلبيه
تحيا كلية الشرطه ورجالة الشرطه الجامدين اوى

غير معرف يقول...

بجد انت حد حقود جدا وواضح اصلا انك متعرفش اي حاجه في اي حاجه يعني لو هتشوف ضباط الشرطه دول بيطلع عين ابوهم قد ايه في الشغل اللي هو اصلا حمايه الشعب وشوف بياخدو مقابل كده ايه مفبييش حاجه مرتباتم في الضياع مع اننا بنشتغل 14 ساعه في اليوم شوف حد بيقعد في شغله فتره زي دي وشوف كام ظابط بيموت كل سنه في سبيل شغله ده انت بس بتبصو عالنقط السلبيه اللي بيعملها بعض الضباط بس ده بسبب الضغط عليهم وكمان لو حد قدم شكوي الظابط دي بيروح مجلس تاديب ويتحقق معاه ولو كان غلطان بياخد جزاءه بس انت بتنسي ان مثلا ظاط ضحي بحياته علشان ينقذ واحده كانت هتتغتصب وكام ظابط بيموت هو بيطارد مسجلين او تجار مخدرات وكمان عاوزك تقارن الامن في مصر ولالمن في امريكا اللي هي اقوي دوله في العالم وشف مين الامن وده دليل ان رجاله الشرطه في مصر الحمد لبلله بيقومو بواجبهم وزياده وعن نفسي افتخر ان في كليه شرطه وان شاء الله بستعداني احمل رساله الامن اللي هي اصعب واسمي الرسالات عالارض وقول رسول الله صلي الله عليه وسلم (عينان لا تمسهما النار عين بكت من خشيه الله وعين باتت تحرس في سبيل الله)

Unknown يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡 婚禮顧問 婚禮顧問 水晶 花蓮民宿 血糖機 血壓計 洗鼻器 熱敷墊 體脂計 化痰機 氧氣製造機 氣墊床 電動病床 ソリッドステートドライブ USB フラッシュドライブ SD シリーズ