الأربعاء، مارس 21، 2007

يوم اكثر سواداً فى تاريخ الحريه

يوم اكثر سواداً فى تاريخ الحريه


فى اليوم ده وصلت مقر المحكمه حوالى الساعه 9:28 ودخلت مبنى المحكمه لكن الحقيقه معرفتش اى حاجه يعنى منين يودى على فين المهم اتعاملت على انى فى بيت ابن خالتى واتمشيت جوه وصدفه لقيت قاعه رقم 4 وكان متعلق جمبيها رول حبيت اتفرج على الاسامى وبالصدفه البحته برضه لقيت اول اسم تقع عينى عليه هوه- عبد الكريم نبيل سليمان- سبحان الله وكان رقم القضية 166










الزحام امام القاعه






طبعا القاعه كانت زحمه على الاخر وكان واقف عسكرى رخم كان ارخم من امين الشرطه اللى كان على باب القاعه بتاعت محكمه محرم بك مكانش راضى يدخل حد وبيتعامل مع كل الناس على اساس انهم ولاد كلب جايين المحكمه علشان يتفسحوا و طبعا كانت القاعه زحمه ناس داخله وناس خارجه و ناس معرفش بتعمل ايه طبعا كان عليا انى استنى 166 قضيه لحد ما سياده العسكرى يسمح لاهلى انى ادخل القاعه اللى على اساس انها الجنه والعسكرى ده هوه رضوان


الغريب فى الموضوع ان القاعه كانت رقم 4 والقاعه فى محكمة محرم بك كانت 4 و عبد الكريم اتحكم عليه ب4 سنين مش عارف هل فيه علاقه بينهم؟؟


الوقت كان بيمر ببطء واتضطريت انى اتمشى فى مقر المحكمه على اساس انها مول تجارى اطلع شويه وانزل شويه اقعد شويه وهكذا بعد فتره حضر والد كريم وانتظر امام القاعه ومضى الوقت وبدأت اكتشف اننى لست الوحيد التى اتيت من أجل تلك القضيه







والد عبد الكريم يبحث عن اسم ابنه فى الرول













والد كريم فى انتظار القضيه مع بعض المهتمين











و توالى الحضور فحضر المحامى ابو خطبه اللى دايما بيحب يوزع الخطب عن الدين فى كل اللقاءات الصحفيه والمرافعات القضائيه و طبعا منساش انه يسلم على صحابه من الامن حبايبه والتقى ببعض الصحفيات و فى اثناء احد تلك اللقاءات كنت استرق السمع لما يقوله و اللى مؤمن انه لا يخرج عن مجرد الجعجعه بكلام لا يقبله عقل مُفكر اللى شد انتباهى وجود احد الاشخاص يستمع للحوار ويبدو عليه الانصات







محمد داوود المحامى فى احد الخطب الاعلاميه









الشخص ده لاحظت انه مستواه الفكرى والتعليمى متدنى يعنى ممكن يكون سواق او سباك او حاجه زى كده المهم اول ما عرف ان فيه صحافه اشتكى على طول من ظابط شرطه لسه ضارب سواق امام المحكمه وخد رخصه وشتمه وفيه ناس كانت وموجوده اكدت الكلام بعد كده بدأ يسمع للمحامى اياه وكان كل مايقول حاجه يقول وبصوت عالى استغر الله العظيم يعنى كان المحامى بيتكلم عن ان كريم نفى وجود الله لقيته بيقول اعوذ بالله وقعد يستغفر ربنا وحاجات من كده كتيير طبعا انا تفهمت هوه بيعمل كده ليه يعنى لما المتعلمين فى البلد سبّوا ولعنوا فى كريم الطبيعى من شخص زى كده انه يعمل كده



انتظرت ثم انتظرت......6 - 23 – 55 – 112 – 154


خلاص رقم القضيه قرب احاول ادخل رحت على الباب وحاولت فرد وقال:


-استنى لما تيجى القضيه هدخلك

على العموم انا جربت محدش يصدق اى حد بيشتغل فى الحكومه المصريهبعد ما رقم القضيه قرب اكتر ولقيت ناس بيدخلوا رحت ادخل قاللى:

-ممنوع


-ليه؟


-ممنوع


اعتقد انى لسه معرفتش السبب


-انا عايز احضر القضيه اللى انا جاى ليها


-ممنوع


-ازاى؟


-انت مش محامى


- بس فيه ناس تانيه دخلت


-دول صحفيين


-وانت عرفت ازاى انت مشفتش كارنيهاتهم؟


-ممنوع


-طب انا جاى احضر القضيه دى هوه ممنوع حضور القضايا؟


-القضية اتاجلت لاخر الجلسه


الحمد لله ممكن الحقها استنى شويه واستعمل معاهم اسلوب الاحترام يمكن يدخلونى لكنى كنت بحلم

واول ما القضيه ابتدت عرفت لان الرتب الكبيره جت والباب اتقفل وصوت الخطبه بتاعت المحامى اياه كان واضح جدا

الصراحه انا كنت هتقهر ازاى مش هيسمحولى بحضور الجلسه اه يا ولا ال......

لكن دايما فى حلول كتيير مع الانظمه القذرة وللمال مفعول السحر

-لو سمحت ممكن ادخل انا عايز اسمع المرافعه


-ممنوع


-ليه؟


-المحاميين بس


فى سرى قولت يابن الكدابه انا اُدام عينيه شايف ناس كتيير بتدخل اشمعنى انا؟

كنت هطلع فلوس اديله بس الناس قالولى انت كده هتوديه فى داهيه خليها فى السر

وطبعا كان فيه ناس بتدفع علشان تدخل

وانا واقف على الباب بسترق السمع زى المغضوب عليهم من دخول الجنه لاحظت الدربكه الامنيه اياها و الناس بدات تسال والرد كانت تحفه اللى يقول دى قضيه فتنه طائفيه واللى يقول دى قضيه ارهاب و حاجات من كده كتيير

الغريب ان ابوه كانوا منعينه من الدخول فرجع لصاحبه لكن صحبه قاله ارجع و زق الباب وقولهم انك ابوه

وفعلا سمع الكلام وراح يفتح الباب قالوله ممنوع راح زق الباب جامد وقلهم ممنوع ايه انا ابوه وصوته على فى المحكمه و طبعا العسكر كشوا ورجعوا لورا راح العميد اللى جوه مشاورلهم انهم يسيبوه ودخل ابو كريم كان واقف على الباب واحد رخم اوى من الامن لابس هدوم مدنى او ملكى بس كانت بيئه اوى و كان بيتكلم بعوجان كأنه شخصيه مهمه وزير المخبرين مثلا

-انت ممكن تاخد فلوس وتدخلنى اصل انا شفت العسكرى بيأخد فلوس؟ انا سألته بسذاجه وامنت ان للفلوس مفعول سحرى

بصلى كده بنظره شك ودخل يتشاور مع عسكرى زميله رجع وقاللى

-الكلام ده ممكن يأذيك متقولش كده بس كان شكله متوتر


-............


-طب تعالى


دخلت القاعه وقاللى


-اسمع المرافعه زى مانت عايز


ما كان من الاول يا ابن ال.....


-على فكره مش اجبارى لو عايز تدفع مش عايز انت حر


حسيت بنبرة صوته بانه بيكلمنى بأحترام يمكن بيحاول يسترضينى وبعد ما كان معوج بقى كلب و كل ده بتأثير الفلوس هاهاهاها البلد دى اللى يعيش فيها يتعلم حاجات غريبه

الصراحه انا كنت مقلق منهم الجماعه دول محدش يضمنهم فقلت ادفع واضمن نفسى مكنش معايا اقل من خمسه جنيه فاضطريت انى ادفعها يلا يارب يولع بيهادخلت وجلست استمع الى المرافعه وكانت مرافعة الاستاذ/حمدى الاسيوطى والصراحه كانت مرافعه اكتر من رائعه
بعد كده تم رفع الجلسه وقام الجميع واقفين وقامت معها مشادات عنيفه جدا وتم التهجم على محامين كريم من قبل المحامين الاخريين و تم توزيع الاتهامات والسباب
ويبدو ان المرافعه الرائعه التى قام بها فريق الدفاع استفزتهم فقرروا الانتقام















الاستاذ احمد سيف كان مكبر دماغه من المعركه















الهجوم على محامين كريم






واضح انه كان متنرفز على الاخر لكن ايه السبب يا ترى؟

















الاستاذ كان بيهددنا ان مفيش كاميرات هتخرج من القاعه بعد تصوير الفضيحه بتاعته هوه و زمايله المحامين







بعد ذلك ذهب طاقم الدفاع عن كريم الى غرفه المحامى وانتظرت سماع الحكم- الصراحه انا كنت خايف اطلع ميدخلونيش تانى وانا دافع 5 جنيه والصراحه كويس انى مطلعتش لانى سمعت الحكم بسرعه واتصدمت

اول ما دخل القاضى القاعه طلب الاحكام فدخل فى الاقفص مجموعه كبيره جميعهم يرتدون البدله الزرقاء وحليقى الرؤوس حاولت ان ابحثبينهم عن كريم ولكن لم اجده وعندما اتى ميعاد النطق بحكم كريم دخل ومعه ثلاثه من الحرس ووقف امام القفص ثلاثه اخرون على ايه مش عارف؟

انا صورت النطق بالحكم بس الصوره مش واضحه ومضلمه بس الصوت كويس

بعد القاضى مارفع الجلسه سمعت تهليل وتكبير وانا كنت عايز اعيط اه والله كنت محبط وعايز اقتل كل اعضاء النظام المصرى القذر من جوايه كنت بسب وبلعن الدوله الصريه البوليسيه القذره

الحكم اتنطق بس تقريبا كنت انا الوحيد اللى مؤيد لكريم لان محامين كريم والمهتمين بالقضيه مكنوش لسه رجعوا

طلعت بره القاعه لقيت المحامى اياه والمحامين زمايله واقفين معاه وحسيت انهم بيتشاركوا نخب النظر وتخليت انهم هيرفعوا كؤوس الشامبانيا ويقولوا لبعض تشيييييرززززززززززز اصلى وانا نازل سمعتهم بيقولوا وهما مبسوطين

اربع سنين حلوين اوى- فى سرى قولت يا ولاد ال.... قاعدين تشمتوا فى الواد ربنا ياخد امثالكوا انتوا اللى بوظتوا البلد ونازل على السلم بحاول اتماسك ان الدموع متفرش من عينى بقيت خايف مش حاسس بالامان فى البلد اللى بتحاسب على الكلام بكره يحاسبونا على الحلم والافكار وبعد كده يحاسبونا بالنفس اللى بنتنفسوا

اه ه ه ه ه ه ه ه ه ه ه ه ه ه يا بلد

حته من فليم ايس كريم فى فى جليم بقى :

هيّه دى النهايه يا كريييييييييييييم لااااااااااااااااااااااااااااااا هيّه دى النهايه لااااااااااااااءءءءءاااااا

بجد كنت محبط لدرجه مرعبه

نزلت علشان الحق اشوف كريم قبل مايمشى كان الامن واقف وبيامن المنطقه وخدت صوره ليه الظابط شافنى وقاللى متصور كتيير علشان مصلحتك ولقيته بيشاور لاتنين مخبرين انا الصراحه خفت وخلعت بعيد لحد ما كريم يطلع









الامن خارج مقر المحكمه







وللاسف ملحقتش اصور غير 6 ثوانى بس لكريم لانى شفتهم بيتابعونى وانا مضمنش الناس دى

كان لابس البدله الزرقاء المميزه وكان حليق الشعر تماما كان شكله مختلف

وطبعا كميه الامن كانت زياده عن اللزوم و لفتت انتباه الناس غير انه كان فيه ناس بتصور وانا منهم.



تمت