السبت، مارس 24، 2007

مش عايزين تعديل دستور .. عايزينك ترحل وتغور








يوم الاتنين 26-3-2007 هيكون يوم الاستفتاء على تعديل ال34 مادة فى الدستور واللى مجلس الشعب وافق عليهم


بس احنا الناس اللى هيطبق علينا الدستور المعدل ومن حقنا ان احنا نقول رأينا دون النظر الى النتيجه لان دى حاجه تانيه مش فى ايدينا


يعنى من حقى لما ابنى يقول لى ايه الدستور المهبب ده هقوله ساعتها انا عملت اللى عليا ورفضته غير ما تقوله انا كنت نايم فى الببت ساعتها ولا فى الحمام


ابنك ساعتها مش هيتعرف ان ليك قيمه بس لو كنت شاركت اعتقد ان موقفك هيكون افضل و هيحترمك لانك رفضت او على الاقل قلت رايك


بعدين تعالى هنا انت ازاى تقبل دستور بييسمح لاى كلب فى النظام عسكرى ولا امين شرطه ولا حته مخبر معفن فى الداخليه انه يخش عليك بيتك و اوضه نومك ويعتقلك ويبهدلك من غير ما تفتح بقك


تخيل كده انك بتتبهدل اُدام مراتك وعيالك – صح منظرك هيبقى وحش اوىىى- لا و تيجى تقول له معاك اذن نيابه بالتفتيش والاعتقال زى الافلام كده يعنى يردعليك بافا حلو ويقولك:


.....اذن نيابه ايه يا روح امك؟؟؟؟ (مشيها يا روح امك) ويخدوك ومترجعش تانى


!!!جوزىىىىىىىىىىى سيبومه هوه عملكوا ايه؟؟؟-


بس يا وليه ملكيش دعوه لحسن متشوفيهوش تانى


خلى بالك من العيال يا صفاء أىىىىىىىىىى


ده الموقف اللى ممكن يحصل ساعتها


ده غير طبعا التصنت على المكالمات و مراقبه التليفونات والبريد و مراقبه كل حاجه فى حياتك و بالقانون


يعنى عيش حياتك تحت عيونهم واذانهم و ابقى ساعتها افتح بقك بقى


و ده كله بسبب الماده 179 و اللى ما صدقنا ان احنا هنخلص من الطوارئ نلاقى حاجه اوسخ لا و بالقانون حاله دستوريه دائمه يعنى


وخد عندك شويه من البلاوى اللى هتسببها الماده دى


قالت أحزاب وجماعات المعارضة الرئيسية في بيان ان تعديل المادة 179 سوف يوقف الضمانات الدستورية للحريات الشخصية... ويفتح الطريق للدولة البوليسية


ويمهد تعديل المادة لسن قانون لمكافحة الارهاب يحل محل حالة الطوارئ المعلنة منذ اغتيال الرئيس أنور السادات برصاص متشددين اسلاميين عام 1981


يدعو تعديل المادة 179 لتعطيل الضمانات الدستورية التي تكفل الحرية الشخصية ضد الاحتجاز والتفتيش والحبس أو تقييد الحرية أو المنع من التنقل الا اذا قامت ضرورة يقررها قاض ويستدعيها تحقيق تجريه النيابة العامة


يسمح تعديل المادة 179 للسلطات الامنية بدخول المساكن وتفتيشها بدون أمر قضائي مسبب كما توقف الحماية القانونية لحرمة الحياة الخاصة وتسمح بالاطلاع على المراسلات البريدية والبرقية والتنصت على المحادثات التليفونية


يسمح تعديل المادة 179 لرئيس الدولة بإحالة المدنيين الى المحاكم العسكرية


يعنى هنترفع لان المحاكم العسكريه دى مفيهاش رحمه لان احكمها لا تناقش يعنى مفيش لا نقض ولا استئناف


ده غير ان القاضى بيقبى عسكرى يعنى ملهوش دعوه بالقضاء والقانون يعنى من الاخر هنترفع برضه


ويقول محللون ان تعديل المادة 179 يجعل بعض بنود قانون الطوارئ المطبق حاليا جزءا من مواد الدستور

والمادة 179 تعطل أحكام المواد 41 و44 و45 من الدستور وهي المواد التي تقوم عليها الحماية الدستورية للحريات الشخصية والحريات العامة.

يعنى الحياة هتبقى زى الفل و عيش براحتك


و خد كمان الماده 88


و اللى هتلغى الاشراف القضائى على النتخابات يعنى نسبه التزوير كانت فى ظل الاشراف القضائى60% مثلا


خلاص بعد كده هتبقى100% وبالدستور يعنى تبقى توفر صوتك و تقعد فى بيتك وتستنى اعلان النتيجه فى الجرايه و اللى انت هتبقى متوقعها طبعا



تقول أحزاب وجماعات المعارضة ان التعديلات تلغي الاشراف القضائي الكامل على عملية الاقتراع في الانتخابات العامة. وتطالب ومعها منظمات المجتمع المدني ببقاء الاشراف القضائي الكامل باعتباره من أفضل وسائل منع الانتهاكات والمخالفات التي تشوب الاقتراع في مصر



وتبقي التعديلات على اشراف قضائي لكن على مستوى لجنة عليا للانتخابات ولجان عامة. أما لجان الاقتراع وفرز الاصوات فسوف تتشكل على الارجح من موظفين في الحكومة


يعن مش هيبقى فى تزوير لا هيبقى اسمه حاجه تانيه اتكسف اقولها بس فى يوم من الايام مش هتكسف وهقولها بعلو صوتى


وتسمح التعديلات لرئيس الدولة بحل مجلس الشعب دون الرجوع للناخبين


يعنى احنا ننتخب و هو يروح جاى حل المجلس يعنى هنلعب مع بعض وطبعا التعديل ده جاى بعد ما بسلامته


مرضاش عن تشكيل المجلس الاخير علشان كده عايز يبقى يعمل حسابه المره الجايه لو معجبوش المجلس يروح جاى حله واحنا نخبط راسنا فى الحيط

بقيت التعديلات مش هقف عندها كتيير لانها مش هتسبب فرق كبير للمواطن المصرى وممكن بعضها يكون تعديلات جيده بس مبارك عامل فخ عايز يحط السم جوه العسل
و التعديلات يتوافق عليها كلها يعنى توافق او متوافقش يعنى مش هتختار حاجات معينه ترفضها و حاجات تانيه توافق عليها
و هيه دى الفكره

بس لازم مننساش ان التعديلات الدستورية المهببه دى لا تصبح نهائية الا اذا وافق عليها الناخبون في استفتاء عام

على الرغم من انها هتطبق والشعب ده هيكون نايم فى العسل بس لما يفوق مش هيكون فى عسل ينام فيه و ساعتها هيقولوا يا ريت وياريتها تنفع فى الوقت ده

و انت مالك هوه انت اللى هتغير الكون؟؟ انت فاكر يعنى ان اللى انتوا بتعملوه ده هيغير حاجه؟


يا عم خليك فى حالك وامشى فى السليم محدش هيتعرض لك


هى بلدنا دى كده مفيش حاجه هتقدر تغيرها الا لما ربنا يريد


ياعم انت فاضى ايه الكلام الفارغ ده انت ما وراكش حاجه تعملها؟؟ اصل ده بينتج من الفراغ


كل الكلام المتخلف بسمعه فى اليوم 100 مرة من شويه ناس اسمهم مصريين الناس دى بتصبنى بحاله تشبه الحموضه بالاضافه الى الاحباط لكن مهما يعملوا افضل كده انا كده ربنا خلقنى كده


انا فعلا كرهت نفسى وكرهت البلد بالناس اللى فيها والناس دى لو مش نوايه تغير يبقى فيه كلام تانى ده مش مجاله




انا مش هخاف من امن دوله ولا هباب و مش هخاف من الاعتقال والبهدله ومش هقف اتفرج على بلدى و هما بيغتصبوها وبيسلبوها اجمل ما عندها و الشعب ال..... واقف يتفرج


اتمنى ان اسمى يكتب فى يوم من الايام فى لوحة الشرف بتاعت مصر ويتقال ان ده فى يوم من الايام حاول انه يغير حاجه شاف انها غلط


بس....... بلاش اسبق الاحداث خلينا فى يوم الاحد الجاى


يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها


و الكلمة الاخيرة

اللى عنده كلمة فليقلها الان او فليصمت الى الابد