السبت، فبراير 17، 2007

و بدأت الرحله

و بدات الرحله

اخيرا بعد مرور سته اشهر من انطلاق الفكره والحلم لانشاء مدونتى الاولى

كان تعرفى الاول عن التدوين فى العام 2005 (العام الساخن الملئ بالحداث) بالصدفه

وكانت اول مدونه اقراها فى حياتى هى مذكرات مزّة مصرية(اه واللهى اسمها كده)
Diary of an Egyptian mozza

و اللى كانت مستفزه فى الوقت ده نظراَ لجراتها الغير معتاده بس بعد كده اتعود على الحريه كل واحد يكنب اللى هوه عايزه
بعد كده تعرفت على مجمع منال وعلاء واللى اتفاجات بكميه الحريه اللى موجوده فيها
وعجبتنى الفكره جدا لانى لقيت متنفس لحريه فى وسط مجتمع مبيحترمش الحريه وبقيت من المتابيعين النشطين للفكره وفعلا حاولت انشئ مدونه واستطعت انشئها بس للاسف فشلت فى التعامل معاها وده احبطنى جدا وكمان غير انى مكانش عندى مواد لعرضها خصوصاّ ان اسكندريه بعيده عن بؤره الاحداث غير ان كل الناس اللى اعرفهم معندهمش ادنى فكره عن التدوين او ايه هيه المدونه لدرجه انى بعتبر نفسى المبشر الاول للتدوين بين الناس اللى اعرفهم وسبب من اسباب انشائى للمدونه هيه نشر ثقافه التدوين وده لايمانى بان التدوين شئ مفيد وممكن يساعد على تغيير السلبيات الموجوده فى مجتمعنا ده غير ان المدونات بتفضح الفساد اللى موجود فى المجتمع ومش بعيد عننا(التحرشات الجنسيه- شرطه التعذيب-الاعتقالات) و مواضيع تانيه كتيير وده بيعتبر نجاح كبير لازم كلنا نشارك فيه عشان كده لازم كلنا نتكلم ولازم نبقى شباب متحضر نعبر عن راينا بصراحه من غير ما نخاف من حاجه ومش لازم يبقى فيه رقابه على حريتنا ولا قمع لافكارنا دى كانت القصة ببساطه بس لازم اشكر الناس اللى ساعدتنى فى ان المدونه دى تطلع للنور

شُكر خاص جداً ليهم

وهم مالك مصطفى و اللى فعلا ادانى الدفعه لانى انشئ المدونه بعد ما كنت كبّرت دماغى و اللى اتشرفت فعلا بمقابلته وفتّح فى دماغى مواضيع كتيير و اللى بعديها صممت فعلا لغايه ما نجحت فعلا.

و بنت مصرية و اللى قدمت لى الدعم التنقى لانشاء المدونه عن طريق تدوينتها كيف تنشئ مدونه

شكراَ لمالك وشكراً لبنت مصريه واللى هفضل مَدين ليهم بالشكر واتمنى فى يوم انّى اوصل لمستواهم