الخميس، فبراير 08، 2007

!عن رحله القاهره أتحدث


















القاهره- العاصمه- مصر كما نطلق عليها فى لغتنا الدراجه
كانت رحلتى الى القاهره مع مجموعه من اصدقائى لمده اربعه ايام هى اولى الرحلات اللتى ننطلق فيها بمفردنا خارج حدود
الاسكندريه المدينه الهادئه على ساحل مصر الشمالى
كانت تلك الرحله صعبه بكل المقايس وكانت البدايه عندماغدر بنا بعض من كانوا ينتظرونا فى القاهره وكنا نعتمد عيهم اعتمادا شبه كليا فى تدبير مكان الاقامه ولكنى كنت شبه متاكد من عدم حضورهم وذلك اعتمادا على احساسى الشخصى
(وكانت الخطه البديله وهى كانت تتلخص فى البحث عن احد فنادق وسط البلد (الممتلئله بالبراغيث
و لذا كان الذهاب من رمسيس الى وسط البلد بمساعده بعض الماره التى تناقضت اقوالهم ووصلنا الى هناك بشق الانفس وبحثنا عن فندق يناسب المبالغ المتوافره معنا ( وكانت تلك الفكره بناء على معلومات مغلوطه مفادها ان الغرفه باحد تلك الفنادق تكلفتها حوالى 35 جنيه وهى معلوه شبه صحيحه اذ كان ينقصه ملحوظه صغيره وهى لكل فرد 35 وليس للغرفه الواحده اى فى حوالى 4 ايام بحسبه بسيطه يكون المجموع 140 جنيه اى معظم ما نمتلكه من مال اذا لم يكن كله)
وكان الترحاب من العاصمه حيث هطل علينا المطر بغزاره شديده مرحبا بنا وكان ذلك اعلانا للفشل الذريع فى ايجاد مكان لوضع الحقائب والراحه
وكانت الخطه البديله الثالثه وهى البحث عن احد بيوت الشباب ( وكان الحوار يدور حول اذا كان يلزم لها كرنيهات خاصه ام تكفى كرنيهات الكليه)وذهبنا الى منطقه امبابه (تحيدا بشارع السودان) بناء على معلومات مغلوطه بوجود تلك البيوت بمنطقه امبابه لنكتشف عند وصولنا انها المدينه الجامعيه ونعرف عندها الا نعتمد على وصف احد العامه الذين اضاعوا من وقتنا الكثير وليعم الاحباط معظمنا ( ولابتهج بهذا لطالما كان حلمى بان اتوه فى هذه المدينه الكبيره وها هو يقترب من التحقق) وانها اذن الخطه البديله الرابعه والاخيره وهى عندما يحين وقت النوم الذهاب الى اقرب مسجد على اعتبار اننا عابرى سبيل
وعدنا لنقطه البدايه فى وسط البلد لنذهب الى مدينه نصر و نتجول فى ارض المعارض ونقرر الذهاب للبحث عن مكان ناكل فيه الطعام فمعظمنا لم ياكل منذ الصباح وكان المقصد هو مطعم كشرى (التحرير) فى شارع عباس العقاد وبعد ان امتلات البطون قررنا الذهاب الى الحسين لنجلس على احد المقهى السياحيه ولنتدبرأمرالمبيت









فى منطقه الحسين امام المسجد

و بعد وصولنا اخذنا جوله فى المنطقه وكانت جوله اكثر من رائعه وبعدها جلسنا على احد المقاهى السياحيه التى يكلف بها كوب( السحلب) 11.5 جنيه مصرى واثناء جلوسنا فوجئنا بسيل من الباعه الجاثلين يعرضون بضائعهم غاليه الثمن قليله القيمه علينا ولكن كان معانا لسوء حظهم بطل من ابطال الفصال وهو صديقى العتيق من ايام الحضانه فهو صديق لى منذ 14 سنه والذى استطاع تحقيق رقم قياسى فى الفصال مع الباعه حيث يمتلك القدره على شراء شئ قيمته 40 جنيه ب5 جنيهات فقط بالفعل نجح فى شراء اشياء كثيره باقل من نصف تمنها المعروضه به بكثير وهو يمثل ازعاج كبير بالنسبه للباعه لدرجه انى اتخيل انه يمكن وضع لافته على ابواب المحلات تقول ممنوع دخول صاحبنا ده
حتى انه نجح فى منع بائعين كثيرين من الاقتراب منا اثناء فتره جلوسنا

وفى اثناء جلوسنا حاولنا البحث عن اماكن للنوم و بالفعل عثرنا على اماكن كثيره ولكن كان يوجد معوقات كثيره منها عدم وجود بطاقات مع بعضنا وفشلت محاولتنا للمبيت فى المسجد بحجه انها منطقه سياحيه ووجود بعض عناصر الشرطه وهذا الكلام الذى لم افهم منه شئ









الكافتريا اللى كوبايه السحلب فيها ب11.5


ولكن كانت المفاجاه المدويه لقد عثرنا على مكان مناسب ماديا ولا يتطلب بطاقات شخصيه ولكنى توقعت شكل فندق يطلب 20 جنيه للغرفه وفى احد ازقه الحسين








موقع الفندق(لو عرفت توصل له ابقى قابلنى)

وذهبنا الى الفندق لنجده فى منطقه غريبه وعمال الفندق اشكالهم مريبه ويدخنون الحشيش فى مدخل الفندق
انه مكان مريب حقا حتى انك تعتقد انه بمجرد طلوع الصباح لن تجد ملابسك عليك
بعد اخذ البيانات صعدنا الى الغرف وكانت خاليه تماما الا من سريرين فقط والحوائط ملطخه بكتابات على غرار- الله اكبر-احمد بيحب منى-حوده البرنس- والارضيه كانت شديده الاتساخ والبطاطين اذ رايتها تعتقد انها معقل البراغيث فى مصر من الاخر فندق حقير جدا من اتلك النوعيه التى تاتى فى الافلام العربيه تحت مسمى بنسيون السعاده او لوكانده الخديوى وامثال تلك الاشياء واثناء ذلك حاولنا النوم فى خلال اضاءه الغرفه حتى يظن اصحاب الفندق اننا لسنا نائمون ولكننا فشلنا ونمنا كالجثث اذا كانت الجثث تنام










فى الصوره دى كنا بنحاول ننام واحنا مغمين عنينا علشان النور

ومع اول شعاع لضوء الشمس لمينا حاجاتنا وسلمنا رجلنا للريح و سيبنا الفندق بلا رجعه
وكان الفطار فى اليوم التالى كما حلمت به دوما فطار بلدى على مقهى بلدى فى القاهره الفاطميه وبالفعل كان كما توقعت
بعد الفطار ذهبنا الى سور الازبكيه لنجد المحلات كلها مغلقه لانه كان يوم الاحد













المائذنه دى كانت فى وش الفندق على طول













قبل الفطار قلنا نتصور شويه













وطبعا حبيت استعرض مهارتى فى التصوير













وبعد الفطار خدنا صوره عالماشى

ثم انطلقنا الى القلعه وتجولنا بالمنطقه

















واضح ان دى صورنا فى القلعه


















وطبعا دى الصور اللى بتثبت انى
مصور مفيش منى اتنين فى مصر



ثم صعدنا الى المقطم لنرى المنظر الساحر من فوق القاهره













احنا هنا على المقطم

وبعد ذلك هبطنا على وسط البد وميدان طلعت حرب مرورا بعماره يعقوبيان والتى انهال علينا بسببها السباب والنظرات المشمئزه لمجرد السؤال عن موقعها للاسف لم يقدر ذلك الشعب تلك الروايه الرائعه للكاتب د.علاء الاسوانى









وسط البلد

مررنا بعد ذلك بشارع عبد الخالق ثروت وكالعاده كان مغلقا بالاف من جنود الامن المركزى و يحوطون المنطقه باكملها وفى حاله استنفار قصوى كاننا فى حاله حرب والغريب ان معظم الماره كانوا يتسالون عن السبب لدرجه اننى اصابنى الشك فى معرفه احد بان نقابه الصحفيين تقع فى ذلك الشارع وان معظم الاعتصامات والمظاهرات تكون فى ذلك المكان
وبعد معاناه طويله وصلنا الى المنيل لركوب النيل كروز(ممفيس)ولكن للاسف تم الغاء اخر رحله لها فى ذلك اليوم
وفى اثناء جلوسنا على كورنيش المنيل علمنا بوصول صديق لنا من الاسكندريه يمتلك شقه فى شارع الهرم وعلى الفور ذهبنا الى هناك بعد معناه شديده وبعد الراحه نزلنا الى شارع الهرم للبحث عن مكان لقضاء السهره وكان المكان وهو ديسكو فندق (حور محب)









شارع الهرم وفندق (حور محب) اوعى تروحه ده حتى اسمه يطفش الخميره من البيت

وكان سعر الدخول هو 50 جنيه مقابل وجب(بطاطس وساندويتش) او بيره وهو مكان ممل جدا لدرجه لا تصدق فهو لايوجد به سوى بعض البنات يدخنون الحشيش والبعض الاخر يتبادلون القبلات مع بعض الشباب الذى يبدو عليه الثراء والباقى يتراقصون على انغام صاخبه غير محدده الملامح وفى الركن يجلس رجل يبدو عليه الوقار ويبدو انه تجاوز سن الخمسين
وبعد تناول العشاء خرجنا مسرعين و ذهبنا الى المنزل وهكذا انتهى اليوم الثانى سريعا
فى الصباح حوالى الساعه الثالثه عصرا وبعد ان صحونا ركبنا المترو متجهين الى كوبرى قصر النيل










دى صوره من على كوبرى قصر النيل

وبعد ان شاهدنا منظر النيل الساحر الذى قد يبدو مملا للبعض ذهبنا الى ميدان التحرير اكلنا الكشرى وجلسنا على احدى المقاهى وامطرت السماء معلنه استمرار فصل الشتاء فى القاهره وفى نهايه الامر سافر صديقنا الى مسقط راسه فى بنى سويف وتركنا وحيدين بلا ماوى فى تلك المدينه العملاقه- لا يهم الرصيف وسادتى والسماء غطائى- قصدى هنتصرف مجتش على نص يوم هنقضيه فى الشارع وفعلا لفينا القاهره كلها تمشينا وسط البلد وعباس العقاد والكورنيش و بعد كده رحنا رمسيس صلينا الفجر هناك فى مسجد الفتح
















وبعد كده ذهبنا لمشاهده شروق الشمس من على الكورنيش ورجعنا لرمسيس مشى وهناك استنينا القطار رقم 901 المتجه الى الاسكندريه المدينه الصغيره الهادئه على ساحل مصر الشمالى رغم ان الحكايه دى ممله بس علشان انا عشتها حسيت بيها و دى كانت اول مره بالنسبه لى انى اسيب اسكندريه انا وصحابى لوحدنا كانت تجربه جميله جدا وخلتنى احب القاهره اكتر واتاكد ان هى من اجمل محافظات مصر بس كان فيه شويه ملاحظات حبيت اكتبها علشان تكون القصه مفيده
الدروس المستفاده:
1-حاجه جميله انك تكون فى القاهره لوحدك حر يعنى بس يكون معاك فلوس وبطاقه دى حاجه اجمل
2-متعتمدش على اى حد ولا تثق باى حد مهما كان فى لحظه معينه ممكن الناس كلها تبيعك فخليك عامل حسابك
3-لا تعمتد على المواطن القاهرى فى الارشاد
4-لا تعبر الطريق فى القاهره وانت مغمض العينين
5- المال هو افضل شئ لضمان السلامه(يعنى حط فلوس فى جيبك وارمى نفسك فى البحر)
6- السعاده ليست مع الاصدقاء غالبا
7-القاهره اجمل فى المساء
8- الحريه اعظم شئ فى الوجود
9-اغسل يديك قبل الاكل وبعده
10-المترو اسرع مواصله فى مصر
11- اللى يقولك رحله القاهره محتاجه عربيه اديله بالبوكس فى وشه
12-لا تدخل ملهى فندق حور محب الليلى
كفايه كده

هناك 5 تعليقات:

ayman elsonabty يقول...
أزال أحد مشرفي المدونة هذا التعليق.
mido1988 يقول...

شكرا يا ايمن وان شاء الله نعمل رحله تانيه اجمد

غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
mido1988 يقول...

اولا احب اشكرك يا (امانى)على تشريفك لمدونتى المتواضعه
وفعلا الرحله كانت بجد تحفه والمشاكل اللى حصلت كانت بسبب ناس باعونا هناك
غير كده الرحله بجد مانت تحفه والقاهره فعلا جميله بس هيه المشكله ان كل واحد مننا كان عايز يروح حته شكل وده خلانا نقسم وقتنا علشان محدش يزعل
وفعلا انا متفق معاكى بخصوص الدروس المستفاده بس احنا كمان وضعنا ثقتنا
فى ناس نعرفهم وبعونا برضه
هيه فعلا كانت تجربه جديده علمتنا ان احنا نعتمد على نفسنا
وبشكرك مره تانيه واتمنى انك تشرفينى تانى