الخميس، فبراير 15، 2007

مشاهده من محاكمه عبد الكريم نبيل سليمان (كريم عامر)1-2-2007

مشاهده من محاكمه عبد الكريم نبيل سليمان (كريم عامر)1-2-2007

روايه مختلفه ساخره للمحاكمه الاخيره لكريم عامر

فى يوم الخميس توجهت انا وصديق لى الى مقر(محكمة محرم بك الجزئيه) وبعد رحله من التوهان بداخل مبنى المحكمه وجدنا اخيرا القاعه المقصوده(قاعه 4) ثم دخلنا القاعه وكانت الجلسه قد بدأت ثم جلسنا فى انتظار قضيه عبد الكريم وكان رقمها 133 و فى اثناء ذلك كان فرد الامن بالمحكمه(امين الشرطه يعنى) يقوم بتغير اماكنا اكثر من مره-كان كل شويه يخلينا نقوم وقعدنا فى حته تانيه وبعدين يخلينا نقوم ويقعدنا فى حته تانيه كررها اكتر من مره وعمل كده مع ناس تانين شكله كان بيلعب (بازل)
المهم بعد فتره من الجلوس والاستماع الى المرافعات الممل همثل قضيه حول (انبوبه بوتاجاز) كانت المرافعه فيها تدور حول (بلف) الانبوبه والخرطوم وان قطر (البلف) 5,5 او اذا اردنا الدقه(على راى المحامى)5,2 شايفين الدقه
وبعد مرور ساعه من المرافعات الممله على نفس المنوال دخل محامى كريم ا/احمد سيف
ودخل بعديه (مالك) صاحب مدونه (مالكولم اكس)
وهما دول بس اللى اخدت بالى منهم علشان هما دول اللى اعرفهم
وبعد مده جاء ميعاد قضيه كريم و اذ بالمحكمه تنقلب راسا على عقب(حصلت دربكه يعنى) وسمعنا:
- فين عبد الكريم؟
- جى يا باشا
-هاتوا عبد الكريم
القاضى: اندهلى قائد الحرس
صاحبى قاللى دى تبقى مسخره لو هرب
وبعد حوالى دقيقتين دخل ظباط كتيير ورتب من اول عسكرى لغايه عقيد
وطلع عبد الكريم فى القفص ومعاه اتنين عساكر و كانه مجرم خطيير جدا
(مستر اكس ) مثلا او( سفاح كرموز) مين سفاح كرموز ده؟
المهم بعد الجيش ده كله ما دخل سمعنا:
-اقفل الباب يبنى
- وما تدخلش حد
وفى سرى قلت(ربنا يستر) اكيد قلت كده وطبعا بلعت ريقى(جلووب)(اكيد عملت كده)
و ابتدى الجد وكان المشهد كالاتى:
لو انت قاعد فى مدرجات الدرجه التاني...... قصدى لو كانت منصه القاضى فى وشك يبقى هتلاقى على يمين القاضى القفص(اللى لا مؤاخذه فيه كريم) و هتلاقى المحامين اللى بيترافعوا عن كريم وعلى شمال القاضى هتلاقى شله المحامين اللى ضد كريم وكانوا حوالى خمسه وهمه اللى كانوا بترافعوا فى كل القضايا اللى فاتت وفى قضيه كريم اتجمعوا مع بعض وفى بدايه المرافعه كانوا كلهم بيحاولوا يتكلموا لكن القاضى طلب منهم انهم يخلوا واحد يترافع نيابة عنهم وكان المحامى الوحيد اللى فيهم (ملتحى)
انا قولت قشطه( اه والله قولت كده) اصلى فكرت:
محامى (ملتحى) عامل متدين يعنى + قضيه ازدراء اديان = اكيد خطبه عصماء وقد كان
ابتدت جلسه القضيه وقرا القاضى عرضه الاتهام وهى ان النيابه تتهم كريم بالاتى:
1- قام بإثارة الفتنة وتحقير الدين الاسلامى بما نسبه الى الله سبحانه وتعالى وسيدنا محمد رسول الله صلى الله عليه وسلم مما يؤدى الى الاضرار بالوحدة الوطنية والدين الاسلامى على النحو المبين بالتحقيقات
2- اذاع عمدا بيانات من شأنها تكدير الامن العام والحاق الضرر بالمصلحة العامة على النحو المبين بالتحقيقات
3- أهان رئيس الجمهورية على النحو المبين بالتحقيقات (وطبعا هو ده المهم واللى حطه فى القفص)

وسال القاضى عبد الكريم عن رايه فى الاتهامات دى
ورد عبد الكريم بصوت مبحوح
: ايوه انا عملت كده بس انا بعبر عن راى بحُريّّه ومش قصدى حاجه من الاتهامات دى
وبعد كده طلب القاضى من الدفاع بتاع عبد الكريم انه يترافع فى الاول بس الدفاع رفض بحجه وجود اوراق ناقصه للقضيه وطلب الدفاع انتداب خبير من كليه الهندسه جامعه الاسكندريه(ساعتها صاحبى قاللى انا موجود اهوه- اصله فى كليه هندسه معلش بيستظرف) لتحديد مكان سيرفر موقع الحوار المتمدن واللى عليه مقالات كريم- وطلب الاستاذ احمد سيف محامى كريم تسجيل اسم الموقع فى محضر الجلسه وسال اذا كان الكاتب بيعرف يكتب انجليزى ولا لا والصراحه كان منظر القاضى محرج ورد وقال مش مشكله احنا معانا الورق-
وده طبعا لتحديد اذا كان يخضع لسلطه القانون المصرى ام لا
و اشاد المحامى التانى اللى مع كريم (واللى الحقيقه معرفش اسمه) بالقضاء المصرى الابتدائى ونفى كلام وزير العدل واللى بيقول فيه ان القضاء المصرى الابتدائى فى حاله غير جيد( حته جندله) صاحبى قاللى كده
واكمل كلامه موضحا بان القضيه جديده على القضاء المصرى وان القضاء المصرى لم يصل لمرحله متقدمه من استخدام التكنولوجيا الحديثه فى القضايا المختلفه
وطلب المحامين بعد كده استكمال اوارق القضيه لكى يتمكنوا من المرافعه
و بعد كده تم اعطاء المجال للمحامى التانى (اللى ضد كريم) واللى طبعا ابتدى المرافعه بايه قرانيه مش فاكرها و وصف كريم بانه مرتد وساعتها انتفض محامى كريم(اللى معرفش اسمه) واعترض على كلمه مرتد واعتبرها سب وقصف وطلب عدم تقيدها فى محضر الجلسه
ووافق القاضى وقال تشطب من محضر الجلسه وقال للمحامى انه ميخرجش عن النص مره تانيه
وكمل المحامى الخطبه بتاعته وطبعا منساش ينبه ان عبد الكريم اهان رئيس الجمهوريه رمز الدوله( حلوه رمز الدوله دى حته جندله برضه) وقعد يقول كلام عن الحرب على الاسلام ومحاربه الكفار والاسلام فى خطر- قال يعنى الاسلام اللى منذ 14 قرن مستنى واحد زى عبد الكريم او غيره انه يمثل خطر ليه وان شويه الكلام الفارغ اللى كريم بيكتبه هيهدم الاسلام واضح ان دى عقليات مفكره مبثقش فى قوه دينها- وفضلت الخطبه مستمره وكل شويه وانت قاعد بتسمع للمحامى ده هتسمعنا بنقول كل شويه(عليه الصلاة والسلام) لانه كل شويه كان بيقول سيدنا (محمد) نروح احنا قايلين (عليه الصلاة و السلام) وطبعا حذر المحامى محامين كريم من الويلات يوم القيامه والعذاب وضياع الاخره لانهم بيدافعوا عن حريه كريم وطبعا منساش فى نهايه الخطبه قصدى فى نهايه المرافعه انه يقتبس مشهد من فيلم عربى قديم وميضرش كمان دمعتين(علشان الدور يتسبك) ويقول:
-انى ابكى انى ابكى ان الاسلام يمتهن والكلام الكبير ده
لدرجه انى اتخيلت انه فى نهايه المرافعه هيقول اسغفر الله لى ولكم واقم الصلاه ونسمع الاقامه مهى مبقتش مرافعه دى خطبه جمعه
واللى انا متاكد منه ان الناس اللى مكانتش مع كريم اتاثرت جداً
و فى خلال المرافعه كان فى تلاته بضيحكوا ان خدت بالى منهم
الاول كان كريم وكان بيبتسم بسخريه لان فعلا الكلام كان كبير لدرجه تخليك تتخيل ان كريم اخطر من امريكا واسرائيل
وتانى واحد لاحظت انه بيضحك كان (مالك) واكيد كان بيضحك لنفس السبب
والتالت كان انا لدرجه انى مكنتش قادر امسك نفسى
بعد كده طلب القاضى من دفاع كريم انه يترافع بس الدفاع قال انه بيطلب استكمال الاوارق الناقصه
وطلب احد محامى كريم(اللى لسه معرفش اسمه) مثول شيخ الازهرامام المحكمه لسؤاله حول مبايعته للرئيس فى الانتخابات بس محامى
كريم الاستاذ احمد سيف رفض وقال انه ده مش مجال القضيه وانه لازم نركزعلى قضيه كريم
وبعد كده رفع القاضى الجلسه( وانا استغربت لان القاضى قال رُفعت الجلسه و ان كنت مستنى انه يقول الحكم بعد المداواله زى الافلام العربى) وطلب القاضى الجلسات السريه (ومحدش يفهم سريّه غلط)
بعد ماخرجنا من القاعه شفت المحامى بتاع الخطبه بيسلم على الظباط وبيحضنهم ويبوسهم وطبعا انا فهمت كده زى مانتم اكيد فهمتم
وسمعنا كلام تانى من ظابط تانى بيقول:
- ايوه يا باشا كله تمام ولسه الحكم واحنا نزلناه تحت( يقصد كريم) ومفيش ناس من اللى بيشتموا فى المحاكم (كنت عايز اقول له انا اهه) ولما الحكم هيصدر هبّلغ سيادتك
وبعد كده وقفت شويه مع مالك وهيّه دى الوقفه اللى خلّت المدونه دى تظهرلان مالك ادانى دَفعه و انا فعلا مَدين ليه بالشكر هوه و(بنت مصريه)لانها فعلا ساعدتنى فى انشاء المدونه دى عن طريق تدوينتها كيف تنشئ مدونه
وخلال وقفتى بره انا وصاحبى انتظار للحكم لاحظت ثلاث بنات يتناقشن مع احد مؤيدى كريم وخلال ذلك سمعت فى تلك المناقشه الحاده اسئله عن من هو عبد الكريم؟
و ماذا فعل؟ و يبيتحاكم ليه؟ طب هو كتب ايه؟
وطب عايزيين الموقع بتاعه؟
وللاسف فشل الشخص ده فى اقناعهم بحريه الراى وان المحامى ده ممثل
وحصلت مشاده كلاميه انتهت بتلاوة احد البنات ايه قرانيه وهى (واذا خاطبهم الجاهلون قالوا سلاما) رد عليها الشخص وقالها سلاما
لظروف خارجه عن ارادتى اضطريت انى اغادر مقر المحكمه قبل بدايه الجلسه مره اخرى
ويارب اكون وفقت لانى اقدم روئيه مختلفه للمحاكمه
محمد منير
محمود فتحى
الخميس
محكمه محرم بك الجزئيه





المحامى احمد سيف محامى كريم












المحامى اللى كان بيترافع ضد كريم

الصور من عند واحده مصرية

ملخص دفاع مركز هشام مبارك عن كريم فى الجنحة 788/2007 جنح محرم بك

يتمسك الدفاع الحاضر مع المتهم بكافة الطلبات المقدمة منه والثابتة فى محاضر الجلسات والمتمثلة فى طلب انتداب خبير من كلية هندسة بجامعة الاسكندرية لتحديد مكان موقع الحوار المتمدن الذى استمد منه الوثائق المسندة للمتهم وتحديد منشئ الموقع ومديره المسئول عن استضافة المادة لتحديد مدى انطباق قانون العقوبات المصرى عليه

كما طلب الدفاع ضم الشكوى المنسوب صدورها لبعض الطلاب التى بناءا عليها احيل المتهم لمجلس اتهام

كما طلب الدفاع ضم تحريات مباحث امن الدولة التى طلبتها النيابة العامة اثناء التحقيقات

التهم:

تقيد الاوراق جنحة بالمواد 98و و 102 مكرر و179 من قانون العقوبات ضد عبد الكريم نبيل سليمان لانه فى غضون عام 2005 بدائرة قسم محرم بك

اولا: قام بإثارة الفتنة وتحقير الدين الاسلامى بما نسبه الى الله سبحانه وتعالى وسيدنا محمد رسول الله صلى الله عليه وسلم مما يؤدى الى الاضرار بالوحدة الوطنية والدين الاسلامى على النحو المبين بالتحقيقات

ثانيا: اذاع عمدا بيانات من شأنها تكدير الامن العام والحاق الضرر بالمصلحة العامة على النحو المبين بالتحقيقات

ثالثا: أهان رئيس الجمهورية على النحو المبين بالتحقيقات

مواد الاتهام:

م 98و ع بعد تعديلها بالقانون بالقانون 147لسنة 2006

يعاقب بالحبس مدة لا تقل عن ستة اشهر ولا تجاوز خمس سنوات او بغرامة لا تقل عن خمسمائة جنيها ولا تجاوز الف جنيه كل من استغل الدين فى الترويج بالقول او بالكتابة او باية وسيلة اخرى لافكار متطرفة بقصد إثارة الفتنة او تحقير او اذراء احد الاديان السماوية او الطوائف المنتمية اليها او الاضرار بالوحدة الوطنية.

م 102 مكرر/1 ع بعد التعديل:

يعاقب بالحبس وبغرامة لا تقل عن خمسين جنيها ولا تجاوز مائتين جنيها كل من اذاع عمدا اخبارا او بيانات او اشاعات كاذبة اذا كان من شأن ذلك تكدير الامن العام او القاء الرعب بين الناس او الحاق الضرر بالمصلحة العامة.

م 179 ع:

يعاقب بالحبس كل من اهان رئيس الجمهورية بواسطة احدى الطرق المتقدم ذكرها.

الدفوع القانونية:

أولا: ندفع بعدم قبول الادعاء بالحق المدنى لمخالفته التنظيم الوارد فى المادة الثالثة من قانون المرافعات بشأن دعوى الحسبة حيث تلزم المدعى المستند على دعوى الحسبة تقديم طلبه للنائب العام وهو ما لم يحدث فى هذه القضية

ثانيا: ندفع ببراءة المتهم من كل ما اسند اليه إعمالا لاحكام الدستور المصرى والعهد الدولى للحقوق المدنية والسياسية بما تقرره من حماية لحرية الرأى والتعبير (الذى اضحى قانون محلى بعد التصديق عليه ونشره فى الجريدة الرسمية فى 15 ابريل 1982 العدد رقم 15 بقرار رئيس الجمهورية رقم 536/1981 ) واعمالا للمادة 60 من قانون العقوبات

ثالثا: ندفع بان الافعال المادية المسندة للمتهم اقترفت خارج البلاد ومن ثم لا تخضع لقانون العقوبات المصرى عملا بقاعدة اقليمية النص وفقا للمواد 1، و2، 3 منه

رابعا: ندفع بعدم انطباق مادة الاتهام الاولى 98و ع لعدم توافر عنصر استغلال الدين الذى تستلزمه المادة حيث تجرم استغلال الدين فى الترويج لافكار متطرفة وهو ما لا ينطبق على ما اسند للمتهم حيث اسند اليه انكاره للدين ومن ثم لا يستقيم هذا الاتهام مع القول باستغلاله الدين لترويج افكار متطرفة

خامسا: ندفع بانتفاء باقى اركان الركن المادى للجريمة المؤثمة بالمادة 98و ع حيث لم تبين ىالنيابة ماهية الافكار المتطرفة المنسوبة للمتهم وما وجه التطرف فيها علاوة على اثبات الغرض من الترويج بالاغراض المحددة فى المادة والمتمثلة فى:اثارة الفتنة او تحقير او ازدراء احد الاديان او الاضرار بالوحدة الوطنية

سادسا: ندفع بانتفاء القصد الجنائى حيث اصر المتهم على انه لم يقصد ازدراء الدين او تحقيره وكلما ما قصده ممارسة حقه فى التعبير عن رأيه فعندما سأله المحقق: "ما الغرض الذى تنشده من نشر هذه الموضوعات على هذا الموقع؟"
جـ: "التعبير عن رأيى لاثبات وجودى فى المجتمع"

وكرر ذات المضمون بصياغات مختلفة ص 2 من محضر مجلس التأديب
"بالطبع انا لا اكتب شيئا غير مقتنع به وهذا لا يعنى ان هذا سيظل ثابتا للابد فكل شئ قابل للتغيير والفكر على رأس هده الاشياء" ص 7 تأديب%% "انا مارست حقى فى التعبير عن رأى وهذه كل تهمتى" ص 9 تأديب
"القانون وضع لتنظيم علاقة الافراد مع بعضهم البعض وبين السلطات ولم يوجد لتقييد حرية الافراد وانا بالعكس لم ارتكب فعلا مخلا بالشرف بل كل ما فعلته هو التعبير عن رأى ومارست حقى" ص 9 تأديب
"واعتقد ان اكثر اللى بيسئ لسمعة مصر هم الذين يحققون معى بسبب اراء شخصية يفترض انى حر فى ابدائها بعيدا عن اى ضغوط وبالنسبة لشبكة الانترنت فلست وحدى الذى ينشر فيها ارائه كل اللى حصل انى اردت ان اكون صريح وشفاف وعرضت رأى بصراحة ونزلت هويتى الشخصية مما ادى الى ربط هذه الاراء المنشورة على هذا المكان الافتراضى بشخص موجود فى عالم الواقع وهو انا وهناك الكثير الذين يكتبون ويتكلمون وينقدون بحرية تامة ولا تطالهم اى عقوبات لانهم يكتبون باسماء مستعارة وهذا اكبر دليل على سلامة نيتى" ص 13 نيابة
"انا لا اعترف بشرعية التحقيق معى بسبب اراء شخصية ليس لها اى اثار على ارض الواقع واعبر عنها بصفتى الشخصية" ص 14 نيابة "انا ذكرت ارائى الشخصية وبأكد ان ارائى دى شخصية" ص نيابة
"انا خصصت لنفسى موقع على الانترنت لابداء ارائى الشخصية" ص 7 نيابة
"لان الانترنت اتاحلنا الفرصة دى تعبير عن ارأنا وانا بعبر على رأى على شبكة الانترنت" ص 9 نيابة
س: "ما قولك فيما قررته ان الدين الاسلامى يدعو الى كراهية الاخر وقتله والتعدى على عرض الاخر"
ج: "ايوه انا قلت الكلام ده وده رأى الشخصى" ص 9 نيابة
"انا كلامى مفهوش تحريض وانا لم احرض احد على شئ" ص 11 نيابة

سابعا: ندفع بعدم انطباق المادة 102 مكرر/1 ع لانتفاء فعل الاذاعة الذى تشترطه المادة وهو ما قد يقصد به انطباقه فقط على المواد المسموعة وليس على المواد المكتوبة

ثامنا: ندفع بانتفاء الركن المادى للجريمة الواردة فى المادة 102 مكرر ع لتخلف تحديد الاخبار او الانباء او الاشاعات المسندة للمتهم ولعدم اثبات كذبها فجاءت اقوال النيابة مرسلة دون تحديد اخبار بعينها منسوبة للمتهم كما لم تثبت النيابة كذب هذه الاخبار

تاسعا: ندفع بانتفاء قصد المتهم فى ترويج اخبار كاذبة من شأنها تكدير الامن العام حيث اصر المتهم على ان كل قصده هو مجرد ممارسة حريته يقول المتهم: لم يحدث اننى ابديت مظاهر غير لائقة ولم يحدث ان تحدثت عن شئ مخالف للحقيقة فى وجهة نظرى على الاقل 13 نيابة

عاشرا: ندفع بانتفاء الركن المادى لجريمة اهانة رئيس الجمهورية حيث ما اسند للمتهم لا يتعلق بشخص رئيس الجمهورية ويعد نقدا مباحا لسياسته فكل ما اسندته النيابة العامة للمتهم بخصوص هذه التهمة هو انه هاجم ايضا نظام الحكم بذكره ان الرئيس مبارك هو رمز الاستبداد وقاهر العباد متهكما بمقولة "بايعو الرئيس مبارك أميرا للمؤمنين"

حادى عشر: ندفع بانتفاء قصد المتهم اهانة رئيس الجمهورية
س: "وما مقصدك من مقولة ان حسنى مبارك امير المؤمنين ومندوب الاله وخليفته على ارض مصر وقاهر العباد ورمز الاستبداد"
ج: "ده رأى وانا بتهكم وانا شايف انه حاكم مستبد" ص 11
"هذا رأيى فى التعليق على هذا الحدث" (مبايعة شيخ الازهر لحسنى مبارك احد المرشحين لانتخابات الرئاسة الاخيرة) ص 8 نيابة
"وتعليقى ده يعتبر تهكم على اللى بيحصل فى مصر وبأكد ان مفيش ديمقراطية وده رأى الشخصى" ص 9 نيابة

وايضا تهمة اهانة رئيس الجمهورية لم يحدد المحقق الفاظ الاهانة

انكر المتهم كل التهم واكد انه لم يقصد الاهانة ولكن قصد نقد سياسة رئيس الجمهورية

اثنى عشر: على سبيل الاحتياط نلتمس اعادة الدعوى للمرافعة لاثبات حقيقة ما يمكن تخمينه من اخبار او انباء او اشاعات اسندت للمتهم

ثالث عشر: ندفع وعلى سبيل الاحتياطى الكلى بوجد ارتباط بين الجرائم المسندة للمتهم مما يستلزم عقابه فقط بعقوبة الجريمة الاشد

ودفع الدفاع بخصوص مدى توافر قصد المتهم فى الجرائم الثلاث فانه بمراجعة اقواله سواء امام مجلس التأديب ام امام النيابة دلل اكثر من مرة على حسن نيته واعتقاده الراسخ بان ما فعله ليس الا ممارسة لحريته فى التعبير عن رأيه فإذا اخطأ فى اعتقاده هذا فانه يشكل ما يسمى فى القانون المصرى وقوع المتهم فى غلط جوهرى أثر على نشوء العلم الصحيح بتوافر سبب من أسباب الاباحة ومن ثم ينفى هذا فى حد ذاته توافر القصد والنية المؤثمة حيث ارتكب ما ارتكب بحسن نية متصورا ان هذا من حقه

كما اكد الدفاع عن انه لا توجد فى قانون العقوبات جريمة تسمى جريمة تغيير الدين او الالحاد


وبشكر الناس دى جدا لانها فعلا ساعدتنى بطريق غير مباشر لانى اكتب التدوينه دى

علاء صاحب مدونه منال وعلاء
وبنت مصريه صاحبة مدونه واحده مصريه
وهيثم صاحب مدونه جار القمر
ومالك مصطفى صاحب مدونه مالكولم اكس
وداليا زياده صاحبة مدونه داليا زياده


















هناك تعليق واحد:

غير معرف يقول...

والله بجد من الحاجات الكويسة انشباب زيكم يدخلوا حاجة زى دى من غير ميقلقوا انا كان زمانى معاكم بس انا المرة الجاية اكيد معاكم وبالنسبة للى حصل انا كان ممكن اضحك على الراجل ابو دقن و كنا يا حنطرد يا حنتحبس و عجبتنى الحتة بتاعت انى ابكى فكرتنى با يام افلام عماد حمدى لما ضرب عبد الحليم
وعقبال المحاكمة الجاية ان شاء الله و ياخد عبد الكريم البراءة